Ien 't jaor 1956 wieër d'r beslote dur 'n paar Lönse verieëneginge dat d'r én carnavalsverieëneging mos komme. De koppe wieëre beej mekaar gestoke, dit gebeurde beej café Litjens (beater beken as Pieëters Thieske).Nao enkele vergaderingen gehâlde te hebbe was de kogel dur de kerk, d'r wieër 'n bestuur gevörmd en 'n verieëneging. Már d'r was toen in din tied wel 'n probleem. Waor mos die carnavalsverieëneging naor toe mit de carnavalbals?
Dat wieër al gauw opgelost en d'r wieër uutgeweke naor café zaal 't Veule ien 't Veule. Daor wisse ze al wat carnaval viere was.
En jawel huur, ien 1957 toog Grad de Mulder (toen as Vôrst) mit zien nar (Cor Cremers) en Raod van Elf en alle Leunenaren naor 't Veule, waor Vorst Grad de urste prins van Luüene op de plénk toverde. Dizze prins zuuj de naam Jan I draage din we baeter kenne as Jan Reintjes van "De Hoef". De carnaval was vur Luüene 'n feit, már allieën nog 'n naam vur de verieëneging. Dat was heus nie zó moeilek.
Het wier de Knöllekes en Knöllinnekes en de verieëneging wier gedöpt as 't Knölleke en dat is tot nów nog steeds zoeë. Már hoe komme we án din naam? Carnavalsverieëneging 't Knölleke is genoemd naor "Knollevraeters", wat al jaore tege òs gezet wier. Wat was 't geval, vroeger wiere d'r ien Luuëne veul knolle verbouwd, as twédde oeëgst vur gruunvoer as de koeien ien 't begin op stal stoonde.
Ien nòvvember is 't de Heilige Catharina, de patrones van de Lönse kermis. Op din dág was d'r Knollenkermis. Dit hieëld natuurlek verband mit de knollenoeëgst. Dizze kermis wier gevierd ien de cafés en nie buute. Dorrum dat de kermis verhuusd is nao enne tied dat 't baeter waer is. Wel nów is d'r eigenlek gén ienwoeëner van Luuëne din vroeger nie zo'n knol rauw van 't veld langs de mouwen gegaete hed. 't was puur boekvulsel, smaak hed 't nie, már ángezien dat snoep en dergelijk ontbraake, dun de Lönse dat en iederieën zei: "Dat is gezoond". Zoeë is de naam "Knollevraeters" ontstaon, már dan ien grötvaders tied.

Uut: "Knölleke 5x11, laes 't már zelf!