Vier jubilarisse gehuldigd

Tiejes 't Prinsenbal zien 4 jubilarisse gehuldigd. 'T bestuur van de Vorsteraod hed hun de welverdiende oonderscheijingen uutgereikt.

Ron is sinds 2013 lid van de raod van 11 en daormit 11 jaor lid. Ondanks dat Ron vanwege zien waerk d'r nie âltied beej kan zien, nimt dat nie weg dat heej hieël actief is vur òs verieëneging.
Want às heej kan, dan is ie d'r ok. Beej 't Knölleke zit heej ien de Kemissie Licht & Geluid. Daornaeve zit heej ok ien de kemissie die de Zittingsaovend organisieërt en zit heej ien de kemissie die de zaal òpbouwt vur al òs activiteiten en werkt heej mit àn òs prinsenwagens.
Sinds 'n paar jaor organisieërt oonder andere de Carnavalsveriëneging de Kermis ien Luuëne en ok draagt Ron zien stieëntje aan beej.

Ok Bas van den Heuvel is 11 joar lid van 't Knölleke. Ok heej zit ien de kemissie van 't Licht & Geluid. Mit Carnavalsmóndag is heej ieën van degene die d'r vur zörgt dat alle Knöllekes en Knöllinekes 'n moj pletske hebbe naeve d'n òptocht ien Rooj. Bas hed ok enkele jaore àn de prinsenwagens mit gebówd.
De maeste kenne Bas wárschienlek ok às DJ. Dat heej dat goed kan, hed heej wel beweze òp enne carnavalsdinsdág toen weej 'n bandje naor huus mosse sture, umdát de stemming mit hun meziek d'r nie aecht ien kwaam. Bas ging aachter de knöp staon en hed d'r nog 'n hieël moj fieëst van wieëte te make.

Toon Janssen is sinds 1991 lid van de verieëneging en dus 33 jaor actief, wat de helft is van zien aege laeftied. Vur dat heej beej 't Knölleke kwaam, was heej actief beej de Hazekeutel.
Toon hed ien al die jaore hieël veul vur de verieëneging gedaon. Jaorelang hed heej àn de prinsenwagens gebówd, már zörgde d'r ok âltied vur dat iederieën veilig de wage òp en ok wér af kwaam.
Beej de òpbowkemissie zörgt heej d'r vur dat de zaal netjes is ien gericht, d'n drank kâld stöt en de tap 't duut.
Heej zit ok al jaore ien de CUP (Commissie Uutkomme Prins) en vervult duk 'n rol ien stukse dat werd òpgevoerd. Ien 2003 kwaam heej zelf uut às Prins Toon d'n Twedde van 't Knölleke.
Às Òpperschenker zörgde Toon dur vur dat de raod âltied wat te drinke haaj. Ok hed Toon hieël wat jaor mit de Âld Prinsen mit gedaon aan de Zittingsaovenden.
Ònlang is Toon gestopt às Raod van Elf lid en is heej benoemd tot ieërelid.

Lam is már liefst 44 jaor lid van 't Knölleke en nog steeds actief betrokken beej òs verieëneging. Lam is ien 1984 vurzitter gewaore en hed dat 13 jaor gedaon.
Ien 1989 was heej 3x11 Jubileejumprins van 't Knölleke. Lam hed hieël veul schilderwerk verricht vur òs prinsenwagens.
Toen Lam às actief lid stopte, is heej ieërevurzitter gewaore. Weej kunne nog steeds beej 'm teraecht vur goeje road.
Lam zörgt d'r ok vur dat de zaal netjes werd iengericht vur ós activiteiten. Umdat heej bestuurslid en manus van alles was beej de Baank, wet heej daor alles te viende.
Às d'r iets te doen is van 't Knölleke, is heej d'r bijna âltied beej., már meschien nie mér tot 't einde às vurhin. Às vreejwilliger zit heej nog duk beej de munteverkoeëp.
Lam is 'n creatief persoeën. Às iets 'n likje verf nuüdeg hed, dan duut heej dat dan wel "efkes". Às d'r 'n kiend werd gebaore beej ien van de leeje van de carnavalsveriëneging, dan kriegt din 'n moj dur Lam geschilderd klumpke van de verieëneging.

Ron, Bas, Toon en Lam, names CV 't Knölleke van harte gefillisitieërd mit òllie welverdiende oonderscheijingen.