't Zit d'r wér òp!
Vastealovend 2025 zit d'r wér op. 'T was 'n moj lang seizoen dat ien nóvvember begos en dat carnavalsdinsdág 4 márt zien làtste hoeëgtepunt kende.
Weej wille alle sponsore, vrijwillgers en kemissies hieël erg veul bedanke vur hun ienzet en iederieën din beejgedrage hed án dit fantastisch seizoen. Már zeker ok de joekskapellen en alle artiesten vur hun geweldige klanke.
Már we wille ok gaer alle bezuukers van alle activiteiten bedanke vur òwlie komst!
Names Prins Eric d'n Urste, Adjudanten Rob & Piet en hun megjes, 't boerebruudspaar Leon en Christianne, 't jeugdkwartet Joep, Meike, Siem en Suze en de leeje van de carnavalsverieëneging: HIEËL VEUL BEDANKT vur enne prachtige vastelaovend!
Dees site zeuj d'r hieël kaal uut zien zoonder foto en videomateriaal, de makers daorvan: Dankewel!
Às PR kemissie hebbe we geprobieërd òwlie wér zó goed meugelek op de hoeëgte te hâlde, oonder andere via dees neeje website.
Már wie zitte d'r ien die kemissie en wat doen die aegelek?
Esther Lap is naeve sikkertaris van òs verieëneging ok degene die alle bestuursleeje en kemissies aachter de bóks àn zit, dat ze òp tied de informasie mit de PR kemissie daele, zoeëdat dees kemissie àn de geng kan. Zeej zörgt d'r ok vur dat de persberichten werre òpgesteld en die beej de krânte en andere media teraecht komme.
Daan van Well is degene din òwlie via Social Media, soms bijna real-time, òp de högte hâld van wat weej doen en gaon doen. Heej is ok de aenege van ós drieën din wel 't verschil wét tussen 'n post, story, bericht, verhaal en reel òp de socials.
Daornaeve zörgt Daan d'r vur dat de LVH Courant ien de wintermaonden altied een bietje dikker is dan de rest van 't jaor en is heej de maker van verschillende posters van òs activiteiten.
Gerton Peeters is naeve fotograaf ok degene din dees neej website hed gemákt (en die ok per ongeluk verwijderd haaj, net naodát die gelancieërd was). Heej zörgt dur vur dat de website âltied up to date is en de foto's d'r zó snel meugelek òp staon. Heej is ok duk òp zuuk nao âld materiaal zoeëdat de historie pagina's elk jaor wér 'n stukse vollediger werre.
'T digitale Knölleke laeft às noeëts te veure. We wille dan ok iederieën bedanke vur alle correcties, opmerkingen, reacties en complimenten!
Same gaon weej alles gaeve, Knöllekes viēr 't laeve! Tot ien novembér!